ଅନୁଗୋଳ ସ୍ଥିତ ନାଲକୋ ସ୍ମେଲଟର ପ୍ଲାଣ୍ଟ ଗେଟ୍ ସମ୍ମୁଖରେ ପୁଣି ଜଣେ ଶ୍ରମିକଙ୍କ ମୃତ୍ୟୁକୁ ନେଇ ଉତ୍ତେଜନା ଦେଖାଦେଇଛି। ଗତ ୨୩ ତାରିଖରେ ନାଲକୋ କାଷ୍ଟ ହାଉସରେ ୪ ଜଣ ଶ୍ରମିକ ପୋଡି ହୋଇଥିଲେ ଓ ମିଥୁନ ନାଥ ପରେ ଆଜି ଦ୍ଵିତୀୟ ଶ୍ରମିକ ବେନ୍ତପୁର ଗ୍ରାମର ରଜନୀକାନ୍ତ ପରିଡାଙ୍କ ମୃତ୍ୟୁ ହୋଇଛି ବୋଲି ଖବର ଆସିଲା ପରେ ଗାଁ ଏବଂ ପରିବାର ଲୋକେ ପ୍ଲାଣ୍ଟ ଗେଟ୍ ସମ୍ମୁଖରେ ଆନ୍ଦୋଳନ ଚଳାଇଛନ୍ତି । ଗତ ୨ ତାରିଖରେ ମିଥୁନ ନାଥଙ୍କ ମୃତଦେହ ନାଲକୋ ଗେଟ୍ ସାମ୍ନାରେ ରଖି ଆନ୍ଦୋଳନ କରା ଯାଇଥିଲା ଓ ତାଙ୍କ ପରିବାରର ଜଣଙ୍କୁ ଚାକିରୀ ଆଉ କ୍ଷତିପୂରଣ ଅର୍ଥ ମିଳିଲା ପରେ ଆନ୍ଦୋଳନ ହଟିଥିଲା । ଆଜି ପୁଣିଥରେ ରଜନୀକାନ୍ତଙ୍କ ପରିବାର କ୍ଷତିପୂରଣ ଆଉ ପରିବାରର ଜଣକୁ ଚାକିରୀ ଦାବି କରି ଆନ୍ଦୋଳନ ଆରମ୍ଭ କରିଛନ୍ତି। ସିଆଇଏସଏଫ ଆନ୍ଦୋଳନକାରୀଙ୍କୁ ହଟିବା ପାଇଁ କହୁଛି ଯାହାକୁ ନେଇ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଛି। ତେବେ ନାଲକୋ କର୍ତ୍ତୃପକ୍ଷ ଓ ପୋଲିସ ଆନ୍ଦୋଳନକାରୀଙ୍କ ସହ ଆଲୋଚନା କରୁଛନ୍ତି।
