କେନ୍ଦ୍ରାପଡା ଜିଲା ପାଟକୁରା ଥାନା ଲେଖନପଡା ଗାଁରେ ଗତକାଲି ରାତିରେ ଏକ ବିବାହ ଶୋଭାଯାତ୍ରାରେ ଥିବା କାର ଦୃଘଟଣାରେ ଦୁଇଜଣଙ୍କର ମୃତ୍ୟୁ ଘଟିଛି । ସେମାନେ ହେଲେ ଲେଖନପଡା ଗାଁର ସୁରେସ ସେଠି ଓ ବର ପାଲିଙ୍କି କାନ୍ଧେଇଥିବା ବ୍ୟକ୍ତି ବଟିରା ଗାଁର ମୁରଲି ମଲ୍ଲିକ । ଗତକାଲି ଦଳୁଆଣି ଗାଁର ପ୍ରମୋଦ ସେନାପତିଙ୍କ ପୁଅ ସ୍ଵସ୍ତିକ ସେନାପତି ଲେଖନପଡା ଗାଁକୁ ବିବାହ ପାଇଁ ଆସିଥିଲେ । କାରରେ ଆସିଥିବା ବର କାରରୁ ଆସି ପାଲିଙ୍କିରେ ବସି ଶୋଭାଯାତ୍ରାରେ ବାହାରିଥିଲା । ବର ଆସିଥିବା କାରକୁ ହଠାତ ଜଣେ ଲୋକ ଷ୍ଟାର୍ଟ କରିଦେବାରୁ ଗିଅରରେ ଥିବା କାରଟି ଦୌଡିବା ଆରମ୍ଭ କରି କାର ସମ୍ମୁଖରେ ଥିବା ଲେଖନପଡା ଗାଁର ସୁରେଶ ସେଠିଙ୍କୁ ଧକ୍କା ଦେଇ ଆଗରେ ଥିବା ଆଉ ଏକ କାର ସହିତ ଧକ୍କା ଦେଇଥିଲା । ଫଳରେ କାର ସମ୍ମୁଖରେ ଥିବା ସୁରେଶ ସେଠିଙ୍କର ଘଟଣା ସ୍ଥଳରେ ମୃତ୍ୟୁ ହୋଇଥିଲା । ଏହି ଦୁଇ କାର ଆଗରେ ପାଲିଙ୍କିରେ ଥିବା ବରକୁ ମଧ୍ୟ ଆଗରେ ଥିବା କାରଟି ଧକ୍କା ଦେବାରୁ ବର ସହିତ ବରକୁ କାନ୍ଧେଇଥିବା କାନ୍ଧେଇ ଥିବା ଲୋକେ ଏକ ପୋଖରୀ ମଧ୍ୟକୁ ଛିଟିକି ପଡିଥିଲେ । ଫଳରେ ବରକୁ କାନ୍ଧେଇ ଥିବା ମୁରଲୀ ମଲିକ ନାମକ ଜଣେ ବ୍ୟକ୍ତିଙ୍କର ମୃତ୍ୟୁ ଘଟିଛି । ବିଭାଘର ପାଇଁ ଗାଁରେ ଖୁସିରେ ଭୋଜିଭାତ ଚାଲିଥିବା ବେଳେ ଏପରି ଦୈବୀ ଦୃଘଟଣା ଲେଖନପଡା ଗାଁରେ ଶୋକର ଛାୟା ସୃଷ୍ଟି କରିଛି । ଇତି ମଧ୍ୟରେ ବିବାହ ଶେଷ କରି ବରକନ୍ୟା ଦଳୁଆଣି ଗାଁକୁ ଫେରିଯାଇଛନ୍ତି ।
