ଅନୁଗୁଳ ଜିଲ୍ଲା ହଣ୍ଡପା ଥାନା ଅଞ୍ଚଳରେ ଯୁବକଙ୍କୁ ଛୁରାମାଡ଼ ଅଭିଯୋଗ । ଅଭିଯୋଗ ଅନୁଯାୟୀ ବଡ଼ହୁଲା ଗାଁର ବନମାଳି ଗୋଛାୟତଙ୍କ ପୁଅ ଅଜିତ ଗୋଛାୟତ ଜରପଡ଼ାରେ ଏକ ଘରୋଇ ସଂସ୍ଥାରେ କାର୍ଯ୍ୟ କରିଥାନ୍ତି । ସେ ବିବାହିତ ହୋଇଥିବାବେଳେ ତାଙ୍କ ଗାଁ ନିକଟସ୍ଥ ଅନ୍ୟ ଏକ ଗାଁର ଜଣେ ଯୁବତୀଙ୍କୁ ଭଲ ପାଉଥିଲେ । ଯୁବତୀଙ୍କ ଅନ୍ୟ ସ୍ଥାନରେ ନିର୍ବନ୍ଧ ହୋଇଥିବା ବେଳେ ଅଜିତଙ୍କ ସହ ତାଙ୍କ ପ୍ରେମ ରହିଥିଲା । ଗତକାଲି ରାତିରେ ଅଜିତ କର୍ମସଂସ୍ଥାନକୁ ଯିବାକୁ କହି ଘରୁ ବାହାରିଥିଲେ । ମାତ୍ର ଯୁବତୀର ଫୋନପାଇ ସେ ତାଙ୍କ ଗାଁକୁ ଯାଇଥିଲେ । ଏହା ଜାଣିପାରି ଯୁବତୀଙ୍କ ପରିବାରବର୍ଗ ଅସନ୍ତୋଷ ବ୍ୟକ୍ତ କରିବା ସହ ଉତକ୍ଷିପ୍ତ ହୋଇ ତାଙ୍କୁ ଛୁରାମାଡ଼ କରିଥିଲେ ଓ ଅଜିତ ଗୁରୁତର ଆହତ ହୋଇଥିଲେ । ଅଜିତଙ୍କୁ ଗୁରୁତର ଅବସ୍ଥାରେ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ମାତ୍ର ଅବସ୍ଥା ଗୁରୁତର ଥିବାରୁ ତାଙ୍କୁ କଟକ ବଡ଼ ମେଡିକାଲ ସ୍ଥାନାନ୍ତର କରାଯାଇଛି ।
