ଅନୁଗୁଳ ଜିଲ୍ଲା ଛେଣ୍ଡିପଦା ପୋଲିସକୁ ଏକ ବଡ଼ ସଫଳତା ମିଳିଛି । କମ୍ପସଲା ଜଙ୍ଗଲ ନିକଟରେ ଡକାୟତି ଯୋଜନା ଚାଲିଥିବା ବେଳେ ଖବର ପାଇ ଛେଣ୍ଡିପଦା ପୋଲିସ ଚଢାଉ କରି ଡକାୟତି ଗ୍ୟାଙ୍ଗର ୬ଜଣକୁ ଗିରଫ କରିଛି । ସେମାନଙ୍କ ନିକଟରୁ ଖଣ୍ଡା, ଭୁଜାଲି ,ଦେଶି ବନ୍ଧୁକ ଭଳି ମାରଣାସ୍ତ୍ର ସମେତ ଗୋଟିଏ ମଟରସାଇକେଲ ଓ ୮ ଟି ମୋବାଇଲ ଜବତ କରିଛି । ପୋଲିସ ସୂଚନା ଅନୁସାରେ ଶନିବାର ରାତିରେ ଏହି ଡକାୟତ ଦଳର ୭ ଜଣ ସଦସ୍ୟ ଛେଣ୍ଡିପଦାରୁ କମ୍ପସଲା ଯାଇଥିବା ରାସ୍ତାର ଜଙ୍ଗଲ ନିକଟରେ ରାତି ପ୍ରାୟ ୧ଟା ବେଳେ ଏକାଠି ଡକାୟତି ପାଇଁ ଯୋଜନା କରୁଥିଲେ । ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ସେମାନଙ୍କୁ ଗିରଫ କରିଛି। ଗିରଫ ହୋଇଥିବା ଡକାୟତମାନେ ହେଲେ ସମ୍ବଲପୁର ଜିଲା ଅଇଁଠାପାଲି ଥାନା ବୁଢାରାଜା ଡେଲି ମାର୍କେଟ ଅଞ୍ଚଳର ସୁନିଲ ଓରଫ ମିଡିଆ ବେହେରା ,ନରସିଂହ ପୁର ଥାନା ଦେଉଭୁଇଁ ଗାଁର ନାଲି ଓରଫ ପ୍ରଶାନ୍ତ ନାଏକ ,ଢେଙ୍କାନଳ ଜିଲା ହିନ୍ଦୋଳ ଥାନାର ହିନ୍ଦୋଳ ଟାଉନ ଅଞ୍ଚଳର ଲିପୁ ନାଏକ , ଛେଣ୍ଡିପଦା ଥାନା କସିଡିହ ଗ୍ରାମର ସନ୍ତୋଷ ସାହୁ , ଏନଟିପିସି ଥାନା ବିଜିଗୋଳ ନୂଆପାଟଣା ଗାଁର ଗଜରାଜ ନାଏକ , ଛେଣ୍ଡିପଦା ଥାନା ଗୋପିନାଥପୁର ଗାଁ ପ୍ରଶାନ୍ତ ନାଏକ ବୋଲି ଜଣା ପଡିଛି । ଏହି ଡକାୟତ ମାନେ କିଛି ଦିନତଳେ ଛେଣ୍ଡିପଦା ଥାନ କମ୍ପସଲା ଗ୍ରାମର ଜୈନକ ବୈକ୍ତିଙ୍କ ଠାରୁ ଏକ ମୋବାଇଲ ଓ ୧୩୦୦ ଟଙ୍କା ମାରଣାସ୍ତ୍ର ଦେଖାଇ ଲୁଟି ନେଇଥିଲେ । ଛେଣ୍ଡିପଦା ଥାନାରେ ଏକ ମାମଲା ରୁଜୁ ହୋଇଛି । ଏହି ଡକାୟତ ଦଳ ରେଢାଖୋଲ , ଜୁଜୁମରା , ଚାରମାଳ , କିଆକଟା , ଅନୁଗୋଳ ଆଦି ଅଞ୍ଚଳରେ ହୋଇଥିବା ବିଭିନ୍ନ ଡକାୟତି ଓ ରାହାଜନୀରେ ସମ୍ପୃକ୍ତ ଥିବା ପୋଲିସ ସୂଚନା ଦେଇଛି । ସେମାନଙ୍କ ନିକଟରୁ ୮ଟି ମୋବାଇଲ , କଟୁରୀ ,ଭୁଜାଲି ଓ ଏକ ଦେଶୀ ବନ୍ଧୁକ ସମେତ ଏକ ମୋଟର ସାଇକେଲକୁ ଜବତ କରାଯାଇଛି ।ଏ ନେଇ ଛେଣ୍ଡିପଦା ଥାନାରେ ଏକ ମାମଲା ରୁଜୁ କରାଯାଇ ଡକାୟତ ମାନଙ୍କୁ କୋର୍ଟ ଚାଲାଣ କରାଯାଇଛି ।
