ବିଜେପି ସହ ସଂପର୍କରେ ଅଛନ୍ତି ମମତାଙ୍କ ୩୮ ବିଧାୟକ:ମିଥୁନ ଚକ୍ରବର୍ତ୍ତୀ

ଗୋଟେପଟେ ମମତା ବାନାର୍ଜୀଙ୍କ ସରକାରରେ ମନ୍ତ୍ରୀ ଥିବା ପାର୍ଥ ଚାଟାର୍ଜୀଙ୍କୁ ଇଡି ଗିରଫ କରିବା ପରେ ବ୍ୟାକଫୁଟକୁ ଯାଇଛନ୍ତି ମମତା । ଠିକ୍ ଏହି ସମୟରେ ବିଜେପି ନେତା ମିଥୁନ ଚକ୍ରବର୍ତ୍ତୀଙ୍କ ବୟାନ ଏବେ ପଶ୍ଚିମବଙ୍ଗ ରାଜନୀତିକୁ ସରଗରମ କରିଛି ।

ବଲିଉଡ ଷ୍ଟାର ତଥା ବିଜେପି ନେତା ମିଥୁନ ଚକ୍ରବର୍ତ୍ତୀ ଦାବି କରିଛନ୍ତି ତୃଣମୂଳ କଂଗ୍ରେସର ୩୮ ଜଣ ବିଧାୟକ ଏବେ ବିଜେପି ସଂପର୍କରେ ରହିଛନ୍ତି । ସେମାନଙ୍କ ମଧ୍ୟରୁ ୨୨ ଜଣ ବିଧାୟକ ବିଜେପିରେ ସାମିଲ ହେବା ନେଇ ଯୋଗାଯୋଗ କରୁଥିବା କଥା ସ୍ପଷ୍ଟ କରିଛନ୍ତି ମିଥୁନ । ମିଥୁନଙ୍କର ଏଭଳି ବୟାନ ଆସିବା ପରେ ପଶ୍ଚିମବଙ୍ଗରେ ମହାରାଷ୍ଟ୍ର ରାଜନୀତିର ପୁନଃରାବୃତ୍ତି ହେବା କଥା ଆଶଂକା କରାଯାଉଛି । ଏନେଇ ଗଣମାଧ୍ୟମ ଅଧିକାରୀମାନେ ଅଧିକ ସୂଚନା ପାଇଁ ମିଥୁନ ଦାଙ୍କୁ କହିବାରୁ ସେ କହିଥିଲେ କି ଫିଲ୍ମ ପୂର୍ବରୁ ପ୍ରଥମେ ମ୍ୟୁଜିକ ଓ ପରେ ଟ୍ରେଲର ରିଲିଜ ହେବ । ଏବେ ମ୍ୟୁଜିକ ରିଲିଜ ହେଲା ଓ ଏହାର କିଛି ସମୟ ପରେ ଟ୍ରେଲର ରିଲିଜ ହେବ ବୋଲି ସେ କହିଛନ୍ତି ।

କହିରଖୁ କି ଗତବର୍ଷ ବିଧାନସଭା ନିର୍ବାଚନ ପୂର୍ବରୁ ବିଜେପିରେ ସାମିଲ ହୋଇଥିଲେ ବଲିଉଡ ଷ୍ଟାର ମିଥୁନ ଚକ୍ରବର୍ତ୍ତୀ । ସେତେବେଳେ ତାଙ୍କର କିଛି ଭାଷଣକୁ ନେଇ ବି ବେଶ୍ ଚର୍ଚ୍ଚା ହୋଇଥିଲା । ଆଜି ସେ ଗଣମାଧ୍ୟମ ପ୍ରତିନିଧିଙ୍କ ବିଭିନ୍ନ ପ୍ରଶ୍ନର ଉତ୍ତର ଦେଇ ମିଥୁନ ଦା କହିଛନ୍ତି କି ବିଜେପି କେବେ ବି ମୁସଲିମ୍ ବିରୋଧୀ ନୁହେଁ । ବିଜେପି ଉପରେ ବାରମ୍ବାର ଦଙ୍ଗା କରାଉଥିବା ଅଭିଯୋଗକୁ ସେ ଷଡଯନ୍ତ୍ର ବୋଲି କହିଛନ୍ତି ।