ଅନୁଗୁଳ ଜିଲ୍ଲା ରେଙ୍ଗାଳି ଥାନା ବାଲିପଶି ଗାଁରେ ବିଭତ୍ସ ହତ୍ୟାକାଣ୍ଡ । ଗାଁର ଜଣେ ଯୁବକଙ୍କ ବିଳମ୍ବିତ ରାତିରେ ମୁଣ୍ଡ ଗଣ୍ଡି ଅଲଗା କରି କୂଅରେ ପକାଇ ଦେଇଛନ୍ତି ଦୁର୍ବୃତ୍ତ । ସୂଚନା ଅନୁଯାୟୀ ଦୁର୍ଯୋଧନ ତୁଙ୍ଗ ନାମକ ଜଣେ ଯୁବକ ଗତକାଲି ରାତିରେ ଘରେ ଶୋଇଥିଲେ ଓ ଭୋର ୪ ଟା ବେଳେ ତାଙ୍କ ସ୍ତ୍ରୀ ଉଠି ଦୁର୍ଯୋଧନ ନଥିବା ଦେଖିଥିଲେ । ଶୌଚ ପାଇଁ ଯାଇଥିବେ ଭାବି ସ୍ତ୍ରୀ ବାସନ୍ତୀ ଘର କାମ କରିଥିଲେ । ତେବେ ବହୁ ଡେରି ପର୍ଯ୍ୟନ୍ତ ନ ଆସିବାରୁ ପରିବାର ଲୋକଙ୍କୁ ଏ ସମ୍ପର୍କରେ ଜଣାଇଥିଲେ । ଆଜି ସକାଳେ ପରିବାର ଲୋକ ଦୁର୍ଯୋଧନଙ୍କୁ ଖୋଜାଖୋଜି କରିବା ବେଳେ ଏକ କୂଅ ଭିତରେ ରକ୍ତାକ୍ତ ଅବସ୍ଥାରେ ତାଙ୍କ ମୃତ ଦେହ ଭାସୁଥିବା ଦେଖିବାକୁ ମିଳିଥିଲା । ଏହାଦେଖି ଗାଁ ଲୋକ ପୋଲିସକୁ ସୂଚନା ଦେଇଥିଲେ । ଘଟଣା ସ୍ଥଳରେ ପୋଲିସ ପହଞ୍ଚି ମୃତଦେହ ଉଦ୍ଧାର କରିଥିଲା । ଦୁର୍ଯୋଧନଙ୍କ ଶରୀରରେ ବହୁ କ୍ଷତ ଚିହ୍ନ ଥିବା ସହ ମୁଣ୍ଡ ଗଣ୍ଡି ଅଲଗା କରି ଦିଆ ଯାଇଥିବା ଦେଖିବାକୁ ମିଳିଥିଲା । ସେପଟେ ଦୁର୍ଯୋଧନଙ୍କ ସ୍ତ୍ରୀ ବାସନ୍ତୀଙ୍କ ଅଭିଯୋଗ ଅନୁଯାୟୀ ଗାଁର ଅନ୍ୟ ଜଣେ ମହିଳାଙ୍କ ସହ ଦୁର୍ଯୋଧନଙ୍କ ଅନୈତିକ ସମ୍ପର୍କ ଥିବା ସନ୍ଦେହ କରି ଗାଁର ସେହି ମହିଳାଙ୍କ ସ୍ଵାମୀ ଓ ସହଯୋଗୀ କିଛି ଦିନ ତଳେ ଦୁର୍ଯୋଧନଙ୍କୁ ମାଡ ମାରିଥିଲେ । ଆଉ ହତ୍ୟା କରିବେ ବୋଲି ଧମକ ଦେଇଥିଲେ । ସେହିମାନେ ହିଁ ଦୁର୍ଯୋଧନଙ୍କୁ ହତ୍ୟା କରିଛନ୍ତି ବୋଲି ବାସନ୍ତୀ ପୋଲିସକୁ ଅଭିଯୋଗ କରିଛନ୍ତି । ସେପଟେ ପୋଲିସ ଶବ ବ୍ୟବଚ୍ଛେଦ କରି ତଦନ୍ତ କରୁଛି । ତଦନ୍ତ ପରେ ଘଟଣା ସମ୍ପର୍କରେ ଜଣା ପଡିବ ବୋଲି ପୋଲିସ କହିଛି । ତେବେ ଏଭଳି ବିଭତ୍ସ ହତ୍ୟାକାଣ୍ଡ ସମଗ୍ର ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
