ଅନୁଗୁଳ ଜିଲ୍ଲା ବଅଁରପାଳ ଓଭରବ୍ରିଜ ଉପରେ କୋଇଲା ବୋଝେଇ ଟ୍ରକ ଧକ୍କାରେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଆହତ ହୋଇଛନ୍ତି । ମୃତକ ଜଣଙ୍କ ବାଲେଶ୍ୱର ଜିଲ୍ଲାର ଆଲୋକ ଦାସ । ସେ ତାଳଚେର ବଡଦାଣ୍ଡସାହିରେ ତାଙ୍କ ଶଶୁର ଘରେ ରୁହନ୍ତି । ତେବେ ମିଳିଥିବା ସୂଚନା ଅନୁସାରେ ସେ ଅନ୍ୟ ଜଣଙ୍କ ସହ ମୋଟରସାଇକେଲରେ କୌଣସି କାମ ସାରି ବଅଁରପାଳ ଆଡୁ ତାଳଚେର ଯାଉଥିବା ବେଳେ ଟ୍ରକ ସହ ଧକ୍କା ହୋଇଥିଲା । ଦୁର୍ଘଟଣା ସ୍ଥଳରେ ହିଁ ଆଲୋକଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଜଣଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି । ପୋଲିସ ଉଭୟ ଗାଡିକୁ ଜବତ କରି ତଦନ୍ତ କରୁଛି ।
