ରାତି ପ୍ରାୟ ୧୦ କି ୧୧ ହେବ । ଦୋକାନ ବନ୍ଦ କରିବା ପରେ ଘରକୁ ବାହାରୁଥିଲେ ଦୁଇ ଭାଇ । ହେଲେ ଏତିକି ବେଳେ ହଠାତ୍ ଆସିଯାଇଥିଲେ ୨ ଦୁର୍ବୃତ୍ତ । ଖାଲି ଆସିଥିଲେ ତାହା ନୁହେଁ ବରଂ ସାଙ୍ଗରେ ଆଣିଥିବା ବନ୍ଧୁକ ଦେଖାଇ ଦୋକାନରୁ ଆରମ୍ଭ କରିଦେଇଥିଲେ ଲୁଟ୍ପାତ୍ । ଏମିତିକି ସୁନା ଚେନ୍କୁ ବି ଭିଡି ନେଇଥିଲେ । ଯାହାର ଭିଡିଓ ସିସିଟିଭିରେ କଏଦ ହୋଇଛି । ଭୁବନେଶ୍ୱର ଲିଙ୍ଗରାଜ ଥାନା ଅଧୀନ ଏକ ତେଜରାତି ଦୋକାନରେ ଅଧ ରାତିରେ ଆତଙ୍କ ଖେଳାଇଥିଲେ ଦୁର୍ବୃତ୍ତ । ବନ୍ଧୁକ ଦେଖାଇ ସବୁ କିଛି କରିଦେଇଥିଲେ ଲୁଟ୍ । ଦୋକାନର ମାଲିକ ଶତ୍ରୁଘ୍ନ ସୁବୁଦ୍ଧି ଓ ସତ୍ୟାନନ୍ଦ ସୁବୁଦ୍ଧିଙ୍କ ଡରାଇ ଧମକାଇ ଏମିତି କାଣ୍ଡ ଭିଆଇଥିଲେ ଦୁର୍ବୃତ୍ତ । ଆଉ ପୁରା ଘଟଣାର ଦୃଶ୍ୟ କିନ୍ତୁ ସିସିଟିଭିରେ କଏଦ ହୋଇଯାଇଛି ।ଉଭୟଙ୍କର କହିବା କଥା ହେଲା ଦୋକାନ ବନ୍ଦ କରି ଯିବା ବେଳେ ହଠାତ୍ ଦୁର୍ବୃତ୍ତମାନେ ପଶିଆସିଥିଲେ । ବନ୍ଧୁକ ଦେଖାଇ ସୁନା ଚେନ୍ ସହ ବ୍ରେସଲଟ୍ ଲୁଟ କରି ବାଇକରେ ଚମ୍ପଟ ମାରିଥିଲେ । କେବଳ ଲିଙ୍ଗରାଜ ଥାନା ଅଂଚଳରେ ନୁହେଁ ବରଂ ପାତ୍ରପଡାଠାରେ ବି ଜଣେ ଯୁବକ ଗାଡିରୁ ଓହ୍ଲାଇବା ବେଳେ ଭୁଜାଲିରେ ହାଣି ସବୁ କିଛି ଲୁଟ କରିଥିଲେ ଦୁର୍ବୃତ୍ତ । ଯାହାର ଭିଡିଓ ସିସିଟିଭିରେ ବି ରହିଛି ।
